Wêreldbou Woensdag – Draaktrane

Deel 1 - die indigo stene


Ek het reeds ‘n paar stukkies stories geplaas oor die drake van Airthai en daarin is daar sprake van die sogenaamde “draaktrane”. Hierdie draaktrane speel ook ‘n redelike groot rol in die kortverhaal “A Dragon’s Freedom”.

Draaktrane is stene of half edelgesteentes wat gevorm word wanneer die trane van die drake in Airthai verhard soos wat dit in aanraking kom met die lug. Hierdie draaktrane kom voor waarookal drake woonagtig is of waar hulle gewoon het. Daar is verskillende soorte draaktrane wat verskillende kleure is en wat verskillende gebruike vir die drake en die drake se bewakers het. Hieronder word die verskillende stene genoem, saam met ’n beskrywing van die funksie daarvan.
Hierdie week gaan ek die indigo stene beskryf en volgende week die res van die soorte draaktrane.

Die indigo stene 
Hierdie stene word meestal in die Middellande gesien en is ook daar die bekendste. Die indigo stene is by verre die algemeenste van die draaktrane en word dus gewoonlik net “draaktrane” genoem, terwyl die ander kleure elk ’n ander naam of name besit.

"Indigo trane word gestort wanneer drake in
rou is of gevange is"

Indigo trane word gestort wanneer drake in rou is of gevange is – soos gebeur het in die koninkryk van Guldargan. Vir dié wat nie die woorde ken waarmee die stene aan die brand gesteek kan word nie is die stene slegs versiering en is veral gesog omdat dit selfs in die donker met ’n lig van binne gloei. In sommige plekke word die stene selfs gebruik vir beligting in die rykste huise – veral die wat in die stad Marglóthborg gevind word. Die gloei van die stene word ook gesien in die grotte onder Treddian en in die tonnels van Holt Haliern, maar die bestaan van groot hoeveelhede van die stene word streng geheim gehou deur die Bewakers van Holt Haliern en die konings van Treddian.

Baie van die stene onder Holt Haliern en die stad Adea in Treddian is trane wat deur die drake in die moerasse noord van die Grootwoud gestort is deur die wilde drake wat daar gewoon het nadat Nasja die drake in Guldargan vrygelaat het. Hulle het daar gerou omdat hulle nie na die see terug kon keer nie en ook vir die drake wat daar en in die Middellande gedood is. Hierdie stene het mettertyd in die strome beland wat na die ondergrondse riviere van die Grootwoud gelei het. Hierdie strome loop onder Holt Haliern deur, deur tonnels en grotte na Treddian.

*Foto van Ioliet deur "Clever Girl Style"

Wêreldbou Woensdag - Write About Dragons

Ek het afgekom op hierdie webwerf verlede week – Write About Dragons. Dit bevat video's van kreatiewe skryfklasse wat deur Brandon Sanderson (skrywer van, onder andere, Elantris en die Mistborn-boeke) aangebied is. Ek het nog nie kans gehad om na al die video's te kyk nie, maar dit lyk na 'n baie goeie hulpmiddel.

Hier is die eerste video om jou 'n idee te gee van wat om te verwag.

Vrydag Fiksie – Ikaira se oorwinning

Ietsie vooraf
Hierdie is dié week se stukkie wat ek geskryf het na aanleiding van Woes se Woord van die Week. Dié week se woord is “wen” en moet die woord “wen” of “oorwinning” in die titel bevat. Met die dat ek Woensdag die wêreldbou stuk “The Midland Wars” op Hersenskim gaan plaas het, was dié gebeure op die voorgrond van my gedagtes.

Vir diegene wat lus is om die hele gedeelte van The Midland Wars te lees, kan hierdie pdf afgelaai word. Ek is wel ook aan die vertaal van hierdie stuk om dit in Afrikaans beskikbaar te hê so gou as moontlik. Maar eers, hier is ’n nuwe Airthai-verhaal.

Ikaira se oorwinning
Die rook van verskeie vure het steeds laag oor die vlakte gelê. Vlekke gebrande gras het suid vanaf die blou waters die Groot Rivier gelê. Reënwolke het begin saampak bo die slagveld en Ikaira het met donker oë na die grys wolke gestaar. Stukkies verbrande gras en blare is deur die wind rondgedwarrel deur die kamp.

“Die oorlog is verby.” Sy stem klink nie soos sy eie nie. Die stelling self klink soos ’n leuen. Sy hele lewe het hy geleef met die wete van die uitgerekte oorlog in die Middellande. Die oorlog wat die volgelinge van Gile net nie wou ophou veg nie. Nou staan hy hier by sy tent in sy kamp en kyk na die soldate feesvier. Na sy vader se dood net ’n dag tevore kan hy nie in die feesvieringe deel nie.

“Ikaira.”

Hy ruk van die skrik toe iemand ’n mantel om sy skouers hang. Hy het nie eens besef dat hy van die koue reënwind begin bewe het nie. Ikaira draai terug na die tent. Binne is verskeie bevelvoerders en sommige van die Bewakers van Holt Haliern en Théotriewe na die noorde. Die Oueres van die Bewakers dra donkerrooi mantels en hy besef dat dit een van die Bewakers se groen mantels is wat oor sy skouers gegooi is. ’n Hartseer glimlag trek-trek aan sy mondhoeke.

“Die oorwinning is ons s’n.” Dan glimlag hy opreg. “Guldargan het gewen. Die Fáll is oorwin.”
Een van die Oueres, Ragnar, tree stadig vorentoe en leun op sy kierie. “Wat van die ander koninkryke – Ealdfesten, Treddian... Aefterra?”

"Die oorlog is verby"

Deur sy uitdrukking en die ander se stilte besef Ikaira dat hy voor ’n toets staan. “Guldargan het baie grond verloor – en sy aansien in die Middellande. Maar ons sal vrede hê,” voeg hy dan by en trek die mantel stywer om sy skouers. “Ons sal ons land weer opbou.” Hy aarsel slegs ’n oomblik. “Met die Bewakers se hulp, hoop ek.”

Ragnar knik sy kop. Ikaira het die toets geslaag. “Die besprekings kan môre begin. Vanaand het ons almal rus nodig. Maar eers moet Guldargan se nuwe koning gekroon word.”

Een van die kapteins bring ’n versierde houtkissie na vore en Ragnar maak dit oop. Binne, op ’n gebondelde stuk materiaal lê die kroon van Guldargan – ’n kroon wat slegs ’n dag tevore steeds op die koning se kop gepryk het tydens die geveg.  Ikaira se hart klop vinniger en hy voel sy palms klam raak. Dan kniel hy voor Ragnar en die Ouere lê die kroon op sy hoof. Wanneer hy opstaan, kniel die Bewakers en kapteins van Guldargan voor hom. Asof hy in ’n waas beweeg, word ’n nuwe mantel om sy skouers gehang en word hy na buite die tent gelei en aan die soldate voorgestel as die nuwe koning. Al begin die reën saggies val, begin die feesvieringe nou opreg.

Terug in die tent skryf Ikaira kort notas, seël dit, en laat roep die boodskappers. Nuus van die nuutgekroonde koning moet so gou as moontlik versprei word. Dan roep hy Ragnar.

“Die Fáll wat nou op die Argavér Vlakte is, is afgesny van toegang tot voedsel.”

“Wat stel u voor, majesteit?” Ragnar se stem is laag, versigtig.


’n Ruk later staan Ikaira op die oewer van die Groot Rivier saam met ’n paar Bewakers, sy kapteins en ’n paar soldate. By hulle is ’n paar bondels kos wat in geoliede lap toegedraai is. Hulle laai die bondels op ’n vlot gemaak uit ’n paar stompe wat rofweg aanmekaar gebind is en laat dit dan by die rivier afdryf in die rigting van die Fáll.

“Die Fáll se vrouens en kinders is ook in hulle kampe,” sê Ikaira. “Ek sal nie met myself kan saamleef as ek weet dat ek hulle laat honger ly nie.”

Ragnar hou Ikaira fyn dop. Die jongerige man se oë is donker. In die laaste paar dae het hy baie beleef. Miskien te veel. Maar sy optrede na die bloedige geveg spreek boekdele.

“U sal ’n goeie koning maak,” sê hy en knik gerusstellend. “Kom rus. Môre is ’n groot dag.”

**

Foto deur Steve Todey , skets deur The Graphics Fairy

Wêreldbou Woensdag – Ameragh, Dienares van die Lig

Kliek hier om die vorige wêreldbou gedeeltes te lees: Die Volk van die See, Die Aanfeald en die Éoghida deel 1 en deel 2.

Die verhaal van Ameragh
Sewe generasies na Lëalië is ’n dogter as eersgeborene van die Wíslic, die leier van die Aanfeald, gebore. Sy is Ameragh genoem, wat “Dienares van die Lig” beteken. As deel van die bloedlyn van die Wíslic is sy ook onderrig en opgelei om eendag as Wíslic van haar mense saam met haar susters. In die jaar van haar vyftiende somer het sy vir die eerste keer van die Oostelike Bewakers ontmoet op een van hulle reise om nuus van die Særíma en ander kusvolke aan die Éoghida en Aanfeald te bring. Na Ameragh die Bewakers ontmoet het, het sy besluit dat sy ook een wil wees, maar het by haar mense gebly omdat sy steeds hiér ’n rol gehad het.

In haar twintigste jaar het sy liefde gevind, soos Lëalië, by een van die Éoghida. Hy was egter ook familie van die Oueres van die volk en hulle troue is deur beide die Wíslic en die Oueres geseën. Maar voordat hulle kon trou het daar weer ’n draak vanaf die Drakespits in Nenemna na Éargestréon in die Land van Ses Riviere gekom. Die draak is weggelei van die mense af deur twaalf van die Aanfeald se beste vegters en het sy dood teëgekom op die grys heuwels buite die stad, maar met ’n swaai van sy silwergrys stert het hy Ameragh se geliefde saam met hom na sy graf geneem.

Sy het rouklere aangetrek en vir ses maande het sy gerou soos die gebruik van die Aanfeald is. Na hierdie ses maande het haar opleiding as Wíslic voortgegaan. Daar was weer vrede in die Land van Ses Riviere, maar verder suid, in die valleie van Morgeneard, was daar probleme.

'n Draak het uit Nenemna gekom

Tussen die drie provinsies van Morgeneard het burgeroorlog gedreig en die mense het besluit om hulp te kry. Een van die provinsies het na die Éargestreon gegaan om hulp van die Wíslic – wie se wysheid wyd bekend was – te gaan vra. ’n Ander provinsie het na na die Bewakers van Éamidthéo gegaan wat wes van Morgeneard was terwyl die derde die hulp van een van die Ahma gevra het.

Ameragh het saam met die Wíslic en twee van die Oueres na Morgeneard gereis en met die leiers, Ahma en Bewakers vergader.  Die situasie in Morgeneard is ontlont, maar Ameragh het weer gevind dat sy tot die lewe van ’n Bewaker aangetrokke is. Sy het weer met haar moeder gepraat en daar  is besluit dat Ameragh vir twee jaar as Bewaker sou gaan lewe. Hiérdie sou dien as deel van haar onderrig as Wíslic en na haar mondigwording het Ameragh na die Bewakers in Éamidthéo gegaan het.

Net ’n paar jaar tevore is vrede in die Middellande gevestig na die Middelland Oorloë wat oor ses dekades gestrek het. Al die inwoners van die Middellande het hard gewerk om hulle tuistes weer op te bou en vinnig het sommige van die stede weer begin floreer. Die hoofpad wat gelei het vanaf die hoofstad van Treddian in die suide, deur die vorige hoofstad van Guldargan en verder noord na die Noordelike Lande is weer opgebou om die hoof handelsroete van die Middellande te word.
Maar alles was nie pluis in die nuwe koninkryke nie. Struwelings langs die nuwe grense van die koninkryke het kort-kort plaasgevind, maar die grootste bedreiging vir die vrede in die Middellande sou die Fáll van Argavér wees.

Jy is hier
Opsoek na kaarte van Ameragh om jou pad te vind? Ek probeer om by elke inskrywing ’n kaart te plaas waar dit nodig is, maar hierdie kaarte kan ook gesien word – en groter gesien word – op hierdie een van my Pinterest plakborde.

Hier is ook twee nuwe kaarte wat ek geteken het – en hulle is sommer in Afrikaans én Engels. Die eerste is ’n kaart van ’n gedeelte van die Oostelike Lande en die tweede is van die Land van die Ses Riviere. Ta-da!

Die Oostelike Lande

Land van die Ses Riviere

Gaan koekeloer gerus op Hersenskim vandag vir nog lekker leesgoed.

Volgende Woensdag: Ameragh die legende

Bronne vir inspirasie

Die Internet het ’n paar wonderlike databasisse as jy opsoek is na inspirasie vir spekulatiewe stories. Hierdie week begin ek met ’n paar wat ek nogal redelik gebruik – beide vir my studies en vir ontspannende lees. Hierdie bronne is gratis om te gebruik al is dit meer akademiesgeörienteerd as baie. Hierdie week se bronne het te make met Germaanse mites en legendes sowel as sprokies en folklore. Geniet dit!

Lees uit die verlede
Folklore and Mythology Electronic Texts
Hierdie databasis is geskep deur Professor D.L. Ashliman (nou afgetree) van die Universiteit van Pittsburgh en bevat skakels na folklore, sprokies, Germaanse mites, so wel as stories van verskeie verskillende kulture. Meeste van hierdie tekste is in Engels. Die navigasie is ook redelik verbruikersvriendelik.

Eddas, Sagas en Wikings!
 Heimskringla.no 
Heimskringla (die naam is afkomstig van die werk deur Snorri Sturluson) is ’n wonderlike argief van Oudnoorse sagas, Eddas en sekondêre werke oor hierdie onderwerp. Tekste en vertalings is is ’n verskeidenheid Germaanse tale beskikbaar. Die argief is ook in ’n wiki-formaat, wat dit maklik maak om te navigeer en tekste af te laai.

Boeke, ou boeke en aanlyn boeke 
Septrionalia
Hierdie is ’n wonderlike argief as jy op soek is na ou tekste in verskeie tale. Byna enigiets is hier te vinde, van Oudiers, tot Latyn. Die webwerf bevat ook verskeie woordeboeke tesame met mitologiese tekste en ander verhale. Die voorkoms is nou nie juis iets om oor huis toe te skryf nie, maar die inhoud maak beslis daarvoor op.

Tot volgende keer,  Á Agrai tellarias or s'agrélar silássa ¬– Mag die Lig van die Een op jou pad skyn.

Foto's deur Stock Exchange.